Пратеникот и претседател на Сојузот на Ромите, Амди Бајрам, деновиве повторно беше мета на медиумите поради неговата дремка во Собрание, и тоа на свечената седница на која се гласаше Законот за ратификација на Протоколот за НАТО.  Дремката на Бајрам ја фати и објективот на нашиот фоторепортер, а веста брзо се прошири на социјалните мрежи, по што следеа и борјни коментари.

Сепак, како што за „Фокус“ изјави Бајрам, вистината е сосема поинаква, бидејќи тој две недели бил во доста лоша здравствена состојба.

-Многу вредам, па затоа постојано ме пишуваат и гледаат дури и кога ќе трепнам! Јас секој ден сум во дневна болница, кој не верува може и да провери, со терапија, тешка бронхопневмонија, ама собрав сили и ги испочитував и НАТО и сите процедури. Да беше некој друг со мојата дијагноза, тешко дека ќе дојдеше во Собрание. Но, собрав сили, по четири часа на инфузија дојдов право во Собрание. Имав многу силно воспаление, но и тоа не ме спречи да дојдам на свечената седница за ратификација на Протоколот за пристапување на Северна Македонија во НАТО – појаснува пратеникот.