Еурофарм Работник можеби не може да оствари триумф во Лигата на шампионите, но затоа во СЕХА лигата, има максимален ефект. Најголемиот скалп, битолчани го зедоа денеска, совладан е Веспрем со 26:24, а тренерот Стефче Алушовски вели дека оваа победа е награда за несреќните порази во ЛШ.

– Честитки за навивачите и играчите. Горд сум што победивме еден европски гигант како Веспрем. Во Лигата на шампионите имавме неколку несреќни резултати, а оваа победа како да беше награда за сето тоа. Се надевам дека момците ќе започнат да веруваат во себе дека вредат многу повеќе. Мислам дека тие сè уште имаат психолошка бариера за да го дадат максимумот, и искрено се надевам дека овој успех ќе ни помогне да започнеме да бележиме резултати кои се очекуваат од нас – изјави Алушовски.