Синот на седумкратниот Формула 1 шампион Михаел Шумахер, Мик, го тестираше болидот на Ферари и оствари одлично време завршувајќи како трет на патеката во Бахреин. Тој во првиот ден го возеше болидот на Ферари и имаше подобро време дури и од актуелниот шампион Луис Хамилтон, додека вчера го тестираше болидот на Алфа ромео и имаше шесто најбрзо време. Со ова презимето Шумахер по пауза од 10 години повторно се појави на болид во Ф1.

Воодушевувањето од одличното возење, но и враќањето на презимето Шумахер на патеките не го криеше двојниот светски шампион Фернандо Алонсо, кој смета дека младиот Мик не смее да чека предолго и првата шанса која ќе му се укаже мора да ја искористи.

– Секогаш е подобро порано да се влезе во Формула 1. Никогаш не знаеш кога „возот“ на Ф1 ќе дојде кога си млад. Тој оваа сезона вози во Формула 2 шампионатот и претпоставувам дека на тоа ќе биде концентриран цела сезона. Ако има добри резултати и добие понуда од некој Ф1 тим, треба да го фати тој „воз“ – вели Алонсо.