Италијанецот Јаник Синер (20) се пласираше во четвртфиналето на „Вимблдон“ откако го совлада Карлос Алкараз од Шпанија во четири сета од мечот од четвртото коло со резултат 6:1, 6:4, 6:7 (8), 6:3 за нешто повеќе од три и пол часа игра.

Моментно 13 играч во светот, во борбата за пласман во полуфиналето ќе се сретне со подобриот од мечот Новак Ѓоковиќ – Тим Ван Ријтховен.

До оваа година, Синер никогаш не напредуваше подалеку од првото коло на „Вимблдон“, а со пласманот во четвртфиналето го повтори најдобриот резултат од Грен слем натпреварувањето. Тој претходно беше меѓу најдобрите осум на „Ролан Гарос“ 2020 и „Австралија Опен“ 2022 година.

Во другите мечеви Белгиецот Давид Гофан со 3:2 го елиминираше Франсес Тијафо (САД). Гофан во четвртфиналето ќе игра против Британецот Камерон Нори кој со 3:0 го совлада Американецот Томи Пол.

Во женска конкуренција чешката тенисерка Марие Бузкова со 7:5 и 6:4 за еден и пол час игра триумфираше над Французинката Каролин Гарсија. За пласман во полуфиналето Бузкова ќе игра против Унс Жабир (Мароко) која со 2:0 беше подобра од Елиз Мертенс (Белгија).

Татјана Марија со 2:1 ја совлада Јелена Остапенко од Летонија. Во четвртфиналето ќе имаме германски дуел, Марија ќе се соочи против Јуле Нимејер која со 6:2 и 6:4 ја совлада Британката Хедер Вотсон.