Алексис Санчез си заминува од Јунајтед
Чилеанецот Алексис Санчез до крајот на преодниот рок, незадоволен од малата минутажа, се очекува да го напушти Манчестер јунајтед и да се врати во Италија. Санчез во минатото во Серија А со успех настапуваше како фудбалер на Удинезе пред да направи трансфер во Барселона. Но, овој пат во Серија А се очекува да биде фудбалер на еден од најголемите италијански екипи, Интер.
Според новинарот Џанлука Ди Марцио, Санчез ги договорил личните услови со Интер, тој дури се согласил на големо намалување на платата само за да си замине од Манчестер јунајтед и да игра редовно. Според новинарот, менаџерот на Чилеанецот, Фернандо Феличевич се наоѓа во Англија на преговори со челниците на Јунајтед со цел да го забрза трансферот.
Најверојатно станува збор за едногодишна позајмица со клаузула за задолжителен откуп на договорот.
Алексис Санчез во Италија играше од 2007 до 2011 година, по што премина во Барселона, а потоа играше и за Арсенал и Манчестер јунајтед каде пак е прогласен за најголемо промашување во ерата по сер Алекс Фергусон.