Во редовите на Јувентус тешко го прифатија поразот од Ајакс, но признаваат дека добија фудбалска лекција, му честитаа на противникот и веднаш ги започнаа подготовките за следната сезона.
Иако медиумите ја бараат главата на Масимилијано Алегри, тоа нема да се случи, стратегот останува во Торино. Причината за тоа е бидејќи управата не може да најде негова замена , Зинедин Зидан се врати во Реал Мадрид, Пеп Гвардиола е невозможна мисија, додека вратите за Антонио Конте се затворени во Јувентус.

– Останувам во Јувентус, имаме многу работа и наредната сезона повторно ќе се обидеме да ја освоиме титулата во ЛШ. Одигравме лошо второ полувреме, голем удел во тоа има и повредата на Дибала. Мора да му честитаме на Ајакс, сосема заслужено обезбеди пласман во полуфиналето – изјави Алегри.

Цехот за елиминацијата затоа ќе мора да го платат фудбалерите, прв на листата за отстрел е Даглас Коста кој сезонава мака мачи со повредите и најверојатно ќе се пресели во Англија.
Сигурно си заминува и Сами Кедира, а многу веројатна е продажба и на Пауло Дибала. Јувентус за него бара 100 милиони евра, а засега најголем интерес пројавија Баерн Минхен, Реал Мадрид и Манчестер јунајтед.

Даниеле Ругани на средбата со Јувентус покажа деја не може да биде достојна замена за ветераните Бонучи, Кјелини и Барѕаљи и тој исто така ќе биде продаден.
Од засилувањата, засега единствено е договорено пристигнувањето на Арон Ремзи од Арсенал.