Лидерот на Самооопределување Албин Курти, кој е и победник на последните парламентарни избори на Косово, изјави за КТВ дека побарал да се сретне веднаш со лидерот на Демократскиот сојуз на Косово, Иса Мустафа, и со кандидатката на оваа партија за премиер, Вјоса Османи.

Но, според Курти, високите претставници на ДСК не прифатиле да се сретнат веднаш и дека таа средба, најавил тој, ќе се одржи во четвртокот.

– Побарав од нив да се сретнам или денеска или наредните денови и сега според се, ќе се сретнеме во четвртокот за да не губиме време да ги започнеме разговорите за коалиција – изјавил Курти за КТВ пренесува Експрес.

Претходно, лидерот на ДСК, Мустафа одби да го признае Движењето Самоопределување како победничка на изборите, изјавувајќи дека резултатот ќе се знае кога ќе заврши целосното броење на гласовите.

Мустафа најави дека заедно со кандидатката на ДСК овие денови ќе се средне со лидерот на Самоопределување.