Здравствените работници во Албанија во последните дваесеттина дена, откако бројот на новозаразени почна на опаѓа, а со тоа и намалената потреба од болнички третман на ковид пациенти „здивнаа” од преполнетите болнички капацитети.

-Поради намалената потреба веќе е затворената четвртата ковид болница во Тирана а во останатите три и исто толку регионални ковид центри хоспитализирани се 192 пациенти, 16 на интензивна терапија, од нив тројца интубирани. И во последното деноноќие продолжува трендот на опаѓање на нови случаи. Опасниот вирус е потврден кај 234 лица од направените 2.962 теста, изјави Огерта Манастрлиу, министерка за здравство.

Таа сепак апелира до граѓаните и деловните субјекти да продолжат со почитување на мерките за спречување на ширењето на заразата.

-Посебно апелираме сега кога почна светиот месец Рамазан да се почитуваат мерките на Комитетот на експерти и препораките на верските заедници да се избегнуваат фамилијарни и други собирања, меѓусебни посети и заеднички ифтарски вечери. Се нека биде во кругот на семејството. Треба да се почитуваат и препораките за однесување за време на молитвите, додаде таа.

Посочи дека и понатаму стои апелот упатен претходно до политичките партии да избегнуваат предизборни собирања на кои дозволено е да има до десет лица со почитување на физичко растојание и задолжително носење заштитна маска.

Како што претходно забележа Мира Ракацоли, претседателка на Комитетот на експерти за справување со пандемијата, токму поради непочитување на забраната за групни собирања, можен е нов бран на заразата.

Непочитувачи на оваа мерка се партиите од опозицијата, на чии собири присуствуваат голем број нивни приврзаници и граѓани, за што јавно обвини и премиерот Еди Рама.