Интересот на граѓаните за патување е во согласност со ситуацијата во која се наоѓаме. Не велам дека нема интерес, но тој е значително помал во споредба со минатите години, рече денеска во Утрински брифинг директорот на туристичката агенција Савана, кој зборуваше во име на Стопанската комора за туризам. 

-Не можеме да кажеме дека не постојат услови за патување, некои земји примаат туристи со ПСР тест, некои и без тест. Некаде се воведоа ограничувања поради Новогодишните празници. Најмногу се патува во Македонија, капацитетите кои се на располагање нудат програми за Нова година согласно протоколите пропишани од Комисијата за заразни болести и Министерството за здравство. Во однос на патувањата во странство, има многу мал број на групни патувања, повеќе се патува индивидуално, рече Пешевски.

Најпопуларни земји за патување се Албанија и Турција, во Србија се патува помалку поради воведувањето на ПЕР тест.

-Патниците се одлучуваат да патуваат во земји каде што не е задолжителен ПСР тест и туристите се повеќе добредојдени. Најмногу се патува во Албанија и Турција, но за среќа има и такви кои патуваат на подалечни дестинации. Туристичките земји и покрај ограничувањата и се обидуваат да ги мотивираат туристите повторно да се вратат, гарантирајќи ја безбедонста со тоа што се придржуваат до строги протоколи, вели Пешевски.

Понудата се разликува во цената, има цени за Истанбул од 129 до 149 евра, за Кападокија од 229 евра, Кушадаси од 199 евра, Анталија од 359 евра за ресорти од висока категорија со авионски превоз. Се нуди и Нови Сад за 99 евра.

Ковид пандемијата не ги предомислува граѓаните кои се одлучни новогодишната ноќ да ја поминат во друштво и надвор од домовите. Во предвид доаѓа изнајмувањето на викендички во Маврово, Никифорово, Крушево и Охрид, каде што цените се движат од 50 до 100 евра изнајмување од вечер. Има и луксузни вили во кои сместување за Нова година чини 500 евра од ноќ. „Слободен печат“ стапи во контакт со сопствениците кои велат дека има заинтересираност и ретко може да се најде слободен простор за изнајмување за прослава. Според директорот на „Савана“ масовните собирања кои се очекува да се случат и покрај предупредувањата на епидемиолозите и покрај забраните од Комисијата за заразни болести, ќе се спречат единствено ако се користат капацитетите кои ги нудат туристичките агенции. Според него, треба да се сменат навиките на граѓаните и наместо сами да наоѓаат хотели за одмор, тоа да го прават со посредништво на агенциите.

По предлог на Агенцијата за туризам уште на почетокот на кризата беше формиран комитет кои предлагаше мерки за ублажување на кризата, голем дел од тие мерки се спроведоа, но агенциите работат со загуби од речиси 90 проценти.

-Ние како Стопанска комора за туризам имавме добар увид во состојбата , како гранкова комора имаме хотелиери, агенции, туристички водичи и образовни институции. Предлозите кои ги дадовме беа многу конструктивни. Нашиот најголем промет што прометот е паднат за 90 отсто и не е коректно да се споредуваме со други гранки каде што прометот е паднат за 20-39 отсто, што беше дел од првиот сет на мерки за финансирање на платите на вработените. Добивме помош за исплата на плати, за што сме благодарни. Но, последната мерка ни даде повеќе ветер во грб бидејќи ни овозможи да ја запазиме ликвидноста. Меѓутоа, голем дел од фирмите имаа проблем да ја користат мерката бидејќи условот беше да го задржат истиот број на вработени од летните месеци, а реално никогаш во ноември немало ист број на вработени како во сезона, рече Пешевски.