Уште еден ковид пацент денеска се обиде да си го одземе животот фрлајќи се од балкон на болница во Тирана каде бил хоспиталзиран.

-Станува збор за 69-годишен маж од Фиер, кој една недела бил хоспитализиран во Инфективната клиника. Се фрлил од балкон од вториот кат од задниот дел на објектот, се здобил со тешки повреди на главата бидејќи паднал на бетонската патека. Лекарите се целосно ангажирани да му помогнат иако тој е во тешка состојба, информираа од полицијата и министертвото за здравство.

Неговиот син за медиумите изјави дека татко му немал никакви психички проблеми.

Ова е четврт ваков случај. Претходно тројца пациенти заразени од Ковид-19 се самоубија со фрлање од болничките балкони на „Шефќет Ндроќи” или ковид-два болница.

Првиот случај беше регистриран на 13 август, кога 29-годишно момче се самоуби со фрлање од третиот кат на оваа болница, вториот на втори септември, кога 65-годишен маж го заврши својот живот скокајќи од четвртиот кат и на први ноември кога 52-годишен маж си го одзеде животот фрлајќи се од четвртиот кат, каде се сместени потешките случаи. И во нивните болнички картони немаше податок дека имале какви било психички проблеми.

Нивните семејства обвинуваат за недоволна грижа и внимание од страна на здравствениот персонал, поради големиот број пациенти.

Во Тирана функцонираат три ковид болници, во кои се сместени 367 пациенти.

Извор: МИА