Алармантно во Србија, драматичен скок на бројот на новозаразени, се бара полициски час
Во последните 24 часа во Србија на коронавирус се тестирани 16.743 лица, од кои позитивни биле 4.157 додека 16 починале, објави српскиот Кризен штаб.
Кон: Нема алтернатива, освен воведување на вонредна состојба
Според последните податоци на Министерството за здравство и Институтот „Батут“, на респиратори се 168 пациенти.
Вчера во Србија беа регистрирани 3.469 позитивни од 13.268 тестирани лица, а починаа 16 лица. Според вчерашните податоци на респиратори биле 164 пациенти.
Досегашните корона рекорди се: најмногу позитивни во еден ден – 7.999, а најмногу луѓе на респиратори – 353, најмногу тестирани 22.837 и најмногу починати – 69.
Во Србија од овој викенд на сила се нови мерки – угостителските објекти и трговските центри работат само до 14 часот, додека маркетите и услужните дејности може да работат до 20 часот.
Бидејќи епидемиолошката ситуација во Србија драматично се влоши во последните денови, на вчерашната седница на Кризниот штаб, медицинскиот дел побара тотално затворање на Србија на 7 до 10 дена, но одлуката за тоа треба да се донесе во наредните денови. Тоа би барало и воведување на вонредна состојба, а покраинскиот секретар вчера напомена и полициски час.
Српскиот претседател Александар Вучиќ рече дека денеска Србија сепак е далеку од вонредна состојба.