Црна Гора има проблем со вработување на домашна работна сила во туризмот, што станува алармантно, затоа што без нејзин ангажман нема развој на овој сектор.

На тоа предупредува и деканот на Факултетот за бизнис и туризам во Будва, Раде Ратковиќ.

– Оваа година максимално ескалираше хроничниот проблем со недостатокот на услужната работна сила во туризмот и угостителството. Луѓето не сакаат да работат за оваа плата и постои можност да останеме без домашна работна сила – вели Ратковиќ.

Тој додава дека во Црна Гора платите се убедливо најниски, а должината на сезонската работа е најкратка на Медитеранот.

Ратковиќ смета дека ниту една дестинација не е одржлива доколку својот туризам го заснова на странски работници.

– Работниците се активен дел од понудата кој може да ја промовира и презентира земјата. Второ, ние немаме интерес како држава да имаме туризам во кој во доминатно не работат наши работници. Тие мораат апсолутно да доминираат, а не кај нас да доаѓаат, како што некои предлагаат, Филипинци, а нашите работници да заминат во друга земја. Се треба да се прилагоди на пазарот – соопшти Ратковиќ.

Тој предупреди дека дефицитот на работна сила би требало да биде знак за предупредување за сериозно да се разгледаат проблемите во туризмот и да се донесе програма за нивно решавање.

– Црна Гора не може да има одржлива економија без туризам, а туризамот не може да биде одржлив ако не е заснован на домашна работна сила и на доминантна понуда на домашни производи преку овој сектор – објаснува деканот на Универзитетот во Будва.

Тоа е, според неговите зборови, долгорочен проблем, поради кој би требало се да се промени од корен.

– Туристичките претприемачи не можат, во услови на постоечки степен на пополнетост и структурна побарувачка и канали на продажба, да обезбедат значително повисоки плати. Хотелите и другите угостителски објекти, имајќи ги во предвид нивните биланси на работење во изминативе три децении, немаат можност да ги зголемат платите на вработените – вели Ратковиќ.