Актуелни уметнички случувања: „Нов светски поредок“ во Мала станица
Националната галерија е меѓу неколкуте избрани музеи и галерии во светот кои добија подарок од словенечката група уметници „Нов колективизам“.
Новата аквизиција на Националната галерија е постер наречен „Нов светски поредок“, инспириран од сегашната пандемија на коронавирусот. Словенечката уметничка група е со светски признати референци за нивното творештво, а составена од Дејан Кнез (Лајбах), Миран Мохар (ИРВИН), Дарко Покорн (Нов колективизам) и Роман Урањек (ИРВИН).
Постерот е создаден како одраз на тековните настани низ целиот свет, а потоа започнала серија виртуелни изложби на постерот во повеќе светски градови (Њујорк, Москва, Рим, Париз, Пекинг, Лондон, Берлин итн.). Делото е создадено на 25 март 2020 година и е дел од акцијата и вербата на словенечкиот „Нов колективизам“ дека тие како уметници, исто така, мора да бидат хроничари на едно време, а уметноста е вистинскиот медиум за искажување на критички став.
Дизајнот на плакатот „Нов светски поредок“ бил испратен на адресите на неколку светски музеи и галерии со кои тие соработуваат и чија работа ја почитуваат, со што се потврди довербата што оваа уметничка група ја препознава во успешното работење на Националната галерија, вклучувајќи ја преку проектот рамо до рамо со светски познати галерии и музеи. Публиката веќе има можност да го види постерот, кој е поставен на објектот Мала станица при Националната галерија.
– Со ова дело, групата „Нов колективизам“ потврдува дека во рамките на култниот уметнички колектив НСК (Neue Slowenische Kunst) дизајнот бил и останува многу важен сегмент од нивниот визуелен идентитет. Нивното најпознато дело е контроверзниот постер за штафетата на Денот на младоста во 1987 година, кој ги донесе во центарот на настаните во поранешна Југославија. Со новата акција „Нов колективизам“ само ги продолжува уметничките реакции на тековните историски настани како што дејствуваат уште од 1984 година, кога се основани – потенцираат од Националната галерија.
(Текстот е објавен во „Културен печат“ број 33, во печатеното издание на „Слободен печат“ на 30-31 мај 2020)