Витаминот Д е неопходен за правилен раст на коските и забите, како и за добрата функција на мускулите и нервниот систем. Имунолошкиот систем има потреба од витамин Д за да се бори против бактериите и вирусите. Заедно со калциумот, витаминот Д исто така помага да се заштитат постарите лица од остеопороза. Витаминот Д се наоѓа во клетките ширум телото и е важен за нивното правилно функционирање.

Ако земањето витамин Д е дел од вашиот секојдневен режим, правите добра работа за вашето здравје. Меѓутоа, ако не го консумирате со една важна група намирници, најверојатно не му овозможувате на вашето тело целосно да ги апсорбира огромните придобивки од тој витамин, вели диетичарката Витни Крауч за „Јади го ова“.

Ако вашето тело има недостаток на витамин Д, на што може да укажат бројни симптоми, треба да размислите за додатоците во исхраната. Експертите препорачуваат луѓето под 70 години да земаат 15 микрограми витамин Д дневно, а постарите од 70 години да земаат 20 микрограми.

Со други зборови, за возрасните кои се изложени на ризик од недостаток на витамин Д се препорачуваат превентивни дози на витамин Д кои се движат од 1.500 до 2.000 IU.

Витаминот Д е витамин растворлив во масти. Тоа значи дека, за разлика од некои други витамини, не се раствора кога се зема со вода. Наместо тоа, потребно е да се консумира со маснотии за правилно да се дистрибуира и апсорбира во телото.

– Со витаминот Д треба да се консумираат корисни маснотии. Тоа се, на пример, маслиновото масло, маслото од авокадо и од лен – вели Крауч.

Колку маснотии да земате со витамин Д? Една студија покажала дека храната со околу 10 грама маснотии може да биде доволна за идеална апсорпција на витамин Д. Неколку парчиња чаден лосос, грст ореви или лажица природен путер од ореви измешани во утринско смуди, исто така, може да бидат едноставни предлози кои ќе ви помогнат да го постигнете тоа.

Витаминот Д е многу важен за метаболизмот на калциум и фосфор, што ја промовира ресорпцијата на овие минерали од цревата и овозможува нивно складирање во коските. Потребен е за правилен раст на коските и забите и за доброто на мускулите и нервните ткива. Витамин Д се формира во кожата за време на сончање, додека потребата за дополнителни количини на витамин Д се добива од храната. Добри извори се: црн дроб, масло, риба, путер, јајца (жолчка).