Ако сте добиле грешна порака за вакцинација на мобилниот, тогаш пак треба да се пријавите
За вакцинација на граѓаните кои се тешко подвижни, а се дома, службите ќе излезат во пресрет и ќе извршат теренска вакцинација, велат од Министерството за здравство за Слободен печат.
Затворениците и оние кои се со престој во болниците, спаѓаат во критична група на граѓани и ќе бидат вакцинирани исто така според здравствените протоколи.
Откако деновиве во редакциите повеќе граѓани се пожалија дека добиле потврда за вакцинација и термин на погрешен телефонски број, односно дека нивните податоци не кореспондираат со пораката што ја добиле и податоците наведени во неа, од МЗ велат дека таквите ќе мора да го презакажат терминот.
– Граѓаните добиваат СМС порака со закажаниот термин за вакцинација на бројот кој го оставиле за контакт во самото аплицирање. Доколку во пораката не се нивните податоци оние што ги добиле, тогаш граѓаните треба да закажат повторно термин внесувајќи ги точните податоци на официјалната веб-платформа vakcinacija.mk, појаснуваат од МЗ за Слободен печат.