Француското претседателство истекува за неколку дена, а Владата е отворена да ја разгледа новата верзија на францускиот предлог доколку таа пристигне, изјави вечерва за „360 Степени“ на ТВ Алсат министерот за надворешни работи, Бујар Османи.

-Француското претседателство е до 30 јуни, тоа значи дека во наредните денови, доколку тие се решат за нов предлог, согласно овие ставови на двете страни кои беа и јавно објавени, ние сме отворени да го процениме. Доколку добиеме предлог, ќе бидат консултирани институциите и ќе донесеме решение. Апсолутно нема да се водиме од хибридни напади, од разочарани политичари кои сметаат дека можат да вратат кариера на бранот на јавното расположение. Ние сме избрани да водиме и ќе водиме доколку сме убедени дека тоа е политика која води напред за граѓаните и државата – наведе Османи.