Сѐ уште ја немаме конечната пресметка на направената штета во МНТ, но факт е дека штета има, вели за „Фокус“ Симона Угриновска, директорка на МНТ, по настанот во петокот, кога навивачката група Шверцери присуствувала на настан, проекција на документарен филм за 30 години постоење на Шверцери.

-Полицијата направи увид, станува збор за исечен тапацир на столиците, откоранти орнаменти и шипки, расклатени столици… Сепак, тоа беше маса на народ, над 700 луѓе- вели директорката на МНТ, за ,,Фокус”.

Видео снимки од настанот се појавија на социјалните мрежи, на кои се гледа дека навивачите скандираат, удираат по столиците, пеат и се однесуваат како на спортски натпревар, а не на културен настан во установа за чија изградба беа потрошени околу 40 милиони евра.

-Посетителите си влегоа културно во театарот, а тоа што се случи потоа беше голем шок. Полицијата влезе внатре, но не интервенираше. Значи, тоа беше маса на народ, слично како на спортски натпревар. Ќе се утврдува колку е точниот износ на направената штета. Околу објавите во одредени портали во кои се бара моја оставка, можам да кажам само дека јас не бегам од одговорност. Ако одговорноста е моја, ќе се соочам со неа – вели директорката.