Бразилскиот претседател Жаир Болсонаро се закани дека Бразил ќе излезе од Светската здравствена организација ако таа, како што рече, не престане да биде пристрасна политичка организација.

Тој за бразилскиот Си-Ен-Ен изјави дека лекот хидроксихлорохин „се вратил” откако била повлечена „срамната” студија за неговиот ефект.

Влијателното британско медицинско списание „Лансет” повлече статија во која се тврди дека лекот против маларија хидроксихлорокин го зголемува ризикот од смрт кај болни од Ковид-19.

Болсонаро тврдеше дека лекот треба да се користи за лекување на пациенти со коронавирус, и покрај недостигот на научни докази за неговата ефикасност.

Бројот на смртни случаи од коронавирусот во Бразил во последните 24 часа се зголеми за 1.005, на 35.026, соопшти бразилското Министерство за здравство.

Во тој период пријавени се 30.830 новозаразени, со што вкупниот број на заразени се зголеми на 645.771.

Бразил е втора земја во светот по бројот на заразени, по САД, и четврта по бројот на починати, по САД, Велика Британија и Италија.