Манчестер сити утревечер против Тотенхем го игра реванш натпреварот од четвртфиналето во Лигата на шампионите, а во сабота го очекува нова пресметка со лондонскиот тим, овој пат во Премиер лигата каде влогот е шампионската титула. Манчестер сити и Ливерпул се во мртва трка за титулата, на четири кола до крајот, „црвените“ имаат 85 бодови, два повеќе од избраниците на Гвардиола.
Менаџерот на Манчестер сити, Пеп Гвардиола е свесен дека е тешко силен тим како Тотенхем да се победи два пати по ред, но не е невозможно.

– Доколку не победиме на двата натпревари оваа недела, ги губиме двете титули. Оваа сезона, Ливерпул ни е неверојатно тежок противник. Обично 84 или 85 бодови се доволно за титулата, а веќе и ние и Ливерпул на четири кола до крајот ја надминавме оваа норма. И двете екипи ја заслужуваат титулата во Премиер лигата, но тој може да оди само на една адреса – вели Гвардиола.

Сепак, пред да се фокусира на титулата во Премиер лигата, Гвардиола и Манчестер сити утревечер мора да го совладаат Тотенхем доколку сакаат да играат во полуфиналето на ЛШ. На првиот натпревар, лондонскиот тим славеше со минимални 1:0.
– Знам колку се фокусирани моите играчи, имаат голема желба да се пласираат во полуфиналето на ЛШ. Дали тоа ќе биде доволно? Не знам – потенцира Гвардиола.