Се интензивира ослободувањето на заробени дрвја во Скопје
Околу 800 дрвја во Скопје, од кои 200 под надлежност на Градот се заробени поради несовесно изведување на градежни работи на улиците. Најголем дел од дрвјата се наоѓаат во општина Центар, каде што денеска градоначалниците на Град Скопје, Петре Шилегов, и на општина Центар, Саша Богдановиќ најавија нивно ослободување.
„Досега се работеше на улиците Живко Чинго, Михаил Цоков, Коле Неделковски, каде беа ослободени 56 дрвја“, рече Богдановиќ.
Локацијата на прес конференцијата беше симболично избрана, во близина на исушено дрво, обележано за сечење, поради заробените корени.
„ Ние ќе направиме се што е во наша моќ, да го сочуваме зеленилото во градот. Управувајќи со системот на Град Скопје, при градежните работи што ги изведуваме, водиме сметка повеќе ниту едно дрво да не биде заробено“, рече Шилегов и додаде дека акција за ослободување на дрвата ќе се одвива и во општина Аеродром, каде се лоцирани 20 заробени дрва.
Акцијата за ослободување на дрвјата ќе се интензивира во текот на претстојниот период, а со неа ќе бидат опфатени и општините Карпош и Чаир.
Очекувањата се дека до крајот на сезонава, истата успешно ќе заврши.