Мароканските служби открија и запленија речиси 9,2 тони масло од канабис што било закопано во песок во регионот Гелмим, соопштија тамошните власти. Веднаш е отворена и истрага за утврдување на сите факти за мрежата на шверцери кои во јануари биле мета на акцијата.

Мароко се вбројува меѓу најголемите светски производители на канабис, билка што најмногу се одгледува во планинскиот регион Риф, на северот на земјата.

Годишното производство се проценува на повеќе од 700 тони чија вредност, според истражувањата од 2020 година, е околу 19 милијарди евра.

Властите во Мароко тврдат дека спроведуваат „интензивни и континуирани“ акции во борбата против криумчари на наркотици. Официјалните податоци за минатата година укажуваат на заплена на 217 тони на масло од канабис, при што се уапсени речиси 98.000 лица.