АИ: Сиријците што се враќаат дома ги силуваат, малтретираат и убиваат
Припадниците на сириските безбедносни служби ги кршат човековите права на бегалците кои се вратиле во Сирија помеѓу 2017 и пролетта оваа година, објави Амнести интернешнл во својот извештај.
-Сириските припадници на безбедносните служби ги изложуваат жените, децата и мажите што се вратиле во Сирија на незаконско или произволно притворање, мачење и злоставување, вклучително и силување и сексуално насилство, пишува во извештајот.
Амнести има документирано тешки прекршувања на човековите права против 66 луѓе, од кои петмина починале. Седумнаесет се исчезнати. Меѓу документираните случаи има и 13 деца.
Според извештајот, една жена раскажала дека разузнавачите тешко сексуално ја злоставувале нејзината ќерка на граничниот премин. Биле силувани и 13-годишно момче и петгодишно девојче, пишува АИ.
Организацијата апелира до земјите да не ги депортираат сириските бегалци назад во Сирија.