АХВ: Закланите коњи Зоолошка ги добила на чување од затворот Идризово, во фрижидерите пронајдени мрши тешки над тон
Инспектори од Агенцијата за храна и ветеринарство, кои вчера извршија вонреден инспекциски надзор во Зоолошката градина констатирале неправилности во постапката и го одзеле месото.
Со контролата од страна на АХВ, утврдено е дека во објект кланица со комора во зоолошката градина, кој не е одобрен од Агенцијата за храна и ветеринарство, заклани се десет копитари, без соодветна документација, односно со непознат здравствен статус, неидентификувани и нерегистрирани и без соодветен документ за движење, иако истите на зоолошката градина и се отстапени на чување во соодветни услови од страна на Управата за извршување на санкции при КПУ- КПД Идризово.
-Во депото, затекнати се и две живи животни, во фрижидерите во склоп на кланичниот објект најдени се мрши од закланите животни во вкупна количина од 1.286 килограми и 100 замрзнати пилиња. Бидејќи месото од закланите копитари потекнува од неидентификувани и нерегистрирани животни со непознат здравствен статус кои се заклани во неодобрен објект, Агенцијата за храна и ветеринарство издаде Решение и нареди нештетно уништување на небезбедното месо на депонијата Дрисла, соопштија од АХВ.
За сторените прекршоци, против правното лице ЈУ Зоолошка градина на Град Скопје и одговорното лице во него, Агенцијата за храна и ветеринарство ќе изрече соодветни казни согласно Законот за ветеринарно јавно здравство, Законот за безбедност на храна, Законот за заштита и благосостојба на животните и Законот за идентификација и регистрација на животните.
Од страна на СВР Скопје кое вчера реагираше по сознанија, на дело фати четворица вработени од Зоолошката и едно надворешно лице како во помошните простории на Зоолошката градина (кујна) како подготвуваат храна од коњи (12 коњи и една мазга) кои ги колат на лице место за месото да го употребат како храна за дивите животни во Зоолошката градина.
Против сите петмината но и против в.д. директорот Кристијан Стаменов ќе биде поднесена кривична пријава до ОЈО Скопје.
Шилегов прашува: Дали за Зоолошка однапред било планирано да стане кланица?