Уште од претходно се најавуваше, а денеска агентот Лео Корси за италијанските медиуми потврди дека македонскиот репрезентативец и следната сезона ќе ги брани боите на клубот од „Луиџи Ферарис“.

37-годишниот Горан Пандев имаше значаен придонес во опстанокот на Џенова во Серија А со девет постигнати голови.

– Тој ќе остане уште една година во Џенова каде што и ќе ја заврши кариерата. Тој е лидерот и почитуван од навивачите, а каде и да играше секогаш бил ценет од јавноста како личност. И покрај неговите 37 години, претставува вистински идол, иако малку и потценет, но и натаму има перформанси како младо момче. Со уште поголема свесност за неговите способности, додавајќи ја тука е и неговата фудбалска интелигенција – рече агентот на нашиот играч, Корси.

Агентот е запознат и со желбата на „Гранде Пандев“ со Македонија конечно да настапи и на едно Европско првенство.

Воедно двајца членови од нашата репрезентација Стефан Ристовски (Спортинг Лисабон, Португалија) и Енис Барди (Леванте, Шпанија), како и Елиф Елмас кој игра за Наполи, во своето интервју Корси ги препорачува на италијанските клубови, како и дел од играчите на ФК Академија Пандев чиј сопственик е токму Горан Пандев.

– Ристовски имаше три прекрасни сезони во Спортинг Лисабон и можеби сега е време да проба други искуства – додаде Корси.