Аријан Адеми за хрватските медиуми изјави дека и во иднина сака да игра за најдобрата македонска репрезентација. Сезонава за Динамо Загреб во најсилниот хрватски шампионат 31-годишниот играч од средниот ред до сега запиша 11 настапи и два голови.

Својот последен натпревар за нашата А селекција го одигра во март минатата година, кога во финалето на плејофот за Светското првенство, по сензационалната победа над Италија (1:0), загубивме од Португалија и останавме без учество во Катар.

После тоа, тој повеќе не беше дел од репрезентацијата, поради неговото здравје, повредите и напорниот ритам на натпреварите, па дури и се шпекулира дека дека Адеми повеќе нема да игра за Македонија.

– Одлучив да продолжам да играм за репрезентацијата. Сакам и можам. Зборував и со селекторот, тој сака да бидам таму и ќе бидам. Тешко ми е да се збогувам, бидејќи групата на луѓе таму е одлична, играме за нашата земја, се пласиравме на последното Европско првенство и сакаме да го повториме тоа. Иако сме во многу тешка група – вели Адеми.

Потсетување дека во квалификациите за пласман на следното ЕП 2024 кои ќе стартуваат во март годинава, избраниците на селекторот Благоја Милевски се наоѓаат во тешка и незгодна група, Англија, Италија, Украина и Малта.

– Свесни сме дека нема да биде лесно, но веќе ја победивме Германија, па Италија и нема од кого да се плашиме. Знам дека Италијанците ќе бидат особено мотивирани против нас, бидејќи ги исфрливме од Светското првенство, но и ние ќе бидеме многу мотивирани, веруваме дека можеме да оствариме нов голем успех – рече Адеми.