Адеми од ДУИ: Не знаеме каде е Кастриот Реџепи, сме немале контакт со него
Арбр Адеми, координаторот на пратеничката група на ДУИ, изјави попладнево дека од неговата партија немале контакти со пратеникот на Беса, Кастриот Реџепи, кој со своето отсуство оневозможи кворум за утврдување на дневниот ред на собраниската седница за недоверба на Владата.
На прашањето дали од ДУИ знаат каде е Реџепи, Адеми рече дека тоа прашање треба да му се упати на пратеникот на Беса. Тој исто така реге дека ДУИ немала контакти со Реџепи, за кого, слично како и Артан Груби, посочи дека е евроатлантски ориентиран и дека тоа е причината поради која не дава поддршка за изгласување на недоверба на Владата.
„Секако дека пратениците се за една Влада која негува европски и евроатлантски вредност, така што срцето на г-дин Реџепи лежи во Вашингтон и Брисел, и јас сум длабоко убеден дека токму неговата одлука лежи тука“, истакна Адеми.
Инаку, пратеникот Реџепи денеска објави на својот Фејсбук профил дека нема да присуствува на седницата за гласање на недоверба на Владата, со што овозможи партиите да немаат кворум.