АБА Лига: Црвена звезда го доби неизвесното вечно дерби со Партизан
Големото дерби во АБА лигата помеѓу Партизан и Црвена звезда заврши со триумф од 85:86 на „црвено-белите“ кои го задржаа максималниот скор по осум кола.
Од друга страна Партизан кој има скор од четири победи и четири порази, на крајот може да жали бидејќи Мекинтаер го промаши шутот за победа и му го нанесе првиот пораз на тренерот Сашо Филиповски откако седна на клупата.
Кошаркарите на Црвена звезда подобро го започнаа натпреварот, а посебно беа подобри во шутот за три поени и во воведните минути постигнаа четири тројки кои им донесоа предност од 16:5. Кошаркарите на Партизан никако не можеа да влезат во шутерски ритам за три поени, но надополнија со офанзивниот скок кој ги врати во резултатска неизвесност и на крајот од првата четвртина имаа негатива од само три поени (19:22).
На полувреме се замина со двоцифрена предност за „црвено-белите“ (40:50) благодарение на одличниот шут за три поени.
Во вториот дел продолжи шутерската серија на гостите кои за 30 минути игра шутнаа 25 тројки и погодија 14 за во последните 10 минути да влезат со предност од девет поени (65:74). „Црно-белите“ со добра игра во одбраната успеаја да ја намалат предноста на големиот ривал по што во последните две минути од натпреварот влегоа со минус два (82:84) благодарение на поените на Пејџ и Мекинтаер.
По тајм-аутот на Обрадовиќ, Црвена звезда постигна поени преку О’Брајант, но Загорац погоди тројка на 30 секунди до крајот и го доведе мечот во неизвесна завршница. Рочести потоа го промаши шутот за три поени, а но последниот напад Партизан имаше шанса за триумф, но Мекинтаер беше себичен реши самиот да го заврши нападот по што промаши и играчите на Црвена звезда можеа да започнат да слават.
Најдобри во редовите на „црвено-белите“ беа Лојд со 18 и Волден со 16 поени, додека кај „црно-белите“ Рашон Томас постигна 19 поени, а Мекинтаер 15.