Државниот секретар на САД, Мајк Помпео, оцени дека косовскиот суверенитет и независност остануваат клучни за безбедноста и стабилноста на Западен Балкан.

Помпео напиша дека Косово, по неодамнешните парламентарни избори и формирање на влада, има нова можност „да го реализира полниот потенцијал, и за своите граѓани и во односите со соседните земји – соопшти американскиот Стејт департмент.

– Повеќе од десет години, нашите две држави имаат силно партнерство засновано на заеднички вредности. САД го поддржуваат Косово на патот кон интеграцијата во трансатлантските институции и ќе продолжат да работат на засилување на владеењето на правото, сузбивање на корупцијата и поттикнување на економскиот просперитет за сите граѓани на Косово – наведе Помпео во честитката по повод Денот на независноста на Косово.

„Охрабрени сме од неодамнешните настани кои сигнализираат чекор кон охрабрување на инвестициите, туризмот и комерцијалните и меѓучовечките врски со Србија, со што се поставува темел за понатамошен напредок кон сеопфатна нормализација во блиска иднина – наведе шефот на американската дипломатија.

Собранието на Косово на 17 февруари 2008 година ја усвои Декларацијата за независност на Косово.