81 отсто од хоспитализираните се невакцинирани, надлежните повикуваат на вакцинација

Вакцинација во Северна Македонија / Фото: EPA-EFE/GEORGI LICOVSKI

Моментално, активни се 15 228 ковид-случаи во државава од кои најголем број 8333 се во Скопје. Според извештаите од болниците, моментно со ковид-19 се хоспитализирани 340 лица, a од нив 81 отсто не се вакцинирани, додека 19 проценти се вакцинирани. Во исто време, 78 отсто од починатите лица од ковид-19 биле невакцинирани, а само 22 отсто примиле вакцина, покажува анализата објавена од Министерството за здравство за вакцинирани од позитивните случаи со ковид-19 во период од 6 август 2021 година до 13 јануари 2022 година.

Изминативе неколку недели, како што се истакнува, притисокот врз болниците е намален што се однесува до хоспитализациите, но зголемени се амбулантските прегледи, кои се движат и до стотина пациенти на ден во една установа.

Во период од 6.8.2021 до 13.1.2022 година на територија на државата како позитивни на ковид-19 се тестирани 85 593 граѓанин, од кои 37 отсто биле целосно вакцинирани, односно 32 079 лица. Според статистиката за изминативе месеци, 53 514 граѓани, односно 63 отсто од позитивните на ковид-19 не биле вакцинирани. Анализата на Министерството покажува дека смртноста кај невакцинираните е драстично поголема.

Во период од 6.8.2021 до 13.1.2022 година 78 отсто од починатите лица со ковид-19, биле невакцинирани, а само 22 отсто примиле вакцина. Според анализите, починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање кај нас, посочуваат од Министерство и апелираат граѓаните да се вакцинираат, бидејќи, како што велат, само така ќе дојдеме до колективен имунитет и ќе спречиме ширење на мутации на ковид-19.

Досега во земјата се направени вкупно 1 692 991 тестирања на ковид-19. Вкупниот број ковид-дијагностицирани лица во земјава од почетокот на епидемијата изнесува 241 651, бројот на оздравени пациенти е 218 340, на починати е 8083.

Извор: МИА

Видео на денот