Диета со зелка – рецепт и начин за лесно симнување килограми
Диетата со зелка е една од најпопуларните на нашиве простори, ако не и пошироко. Знам дури и многу жени кои ми ја имаат препорачувано не само како режим на исхрана, туку едноставно како „чистење“ на организмот, но за мене не беше предизвик, или пак беше преголем предизвик 🙂
Иако е едноставна и се однесува најмногу на внесот на зелката низ деновите додека јадете регуларно храна без многу масти и јаглехидрати, оваа диета е всушност – конзумирање супа од зелка. Рецептот има потекло од многу одамна, а бил популарен по втората светска војна, користејќи ја зелката во чорба како можност за закрепнување и стабилизирање на имунитетот. Освен за општото здравје, оваа комбинација на зеленчуци во супата, може да направи еден вид детокс на организмот.
Па кој е вистинскиот рецепт?
За да ја направите оваа супа, или чорба, потребно ви е:
3 главици кромид
2 зелени пиперки
1 конзерва доматен сос или пелат (домати во сос)
свеж целер по желба
2 мали моркова
голема главица зелка
1 лажица од следниве мешунки: леќа, пченица, јачмен и сув грашок
масло,
сол
Подготовка:
Прво потребно е да ги пропржите ситно исечканите кромид, морков, пиперка и целер. Откако ќе се заруменат, додајте го целерот и потоа мешункастите зеленчуци. Додајте го доматниот сос и малку вода и оставете сета комбинација да се свари. Сосема пред крај, додајте ја зелката исечкана на ситни парчиња, оти таа најбрзо се вари. Потребно е само неколку минути да омекне, а да ги задржи сите хранливи состојки, минерали и витамини.
Начин на конзумирање
Супата можете да ја јадете секогаш кога чувствувате глад, односно – кога и да посакате. Некои од поборниците на оваа „чудотворна“ диета велат дека колку почесто ја јадете, толку побрзо може да стопите килограми. Супата всушност прави детоксификација и ви го забрзува метаболизмот.
Доколку веќе имате воспоставен режим на исхрана, оваа супа само ќе ви помогне во смалувањето на вишокот килограми. Значи – исхрана без многу масти, исфрлени шеќери и јаглехидрати, во комбинација со оваа витаминска супа, можат многу брзо да ве доведат до саканите резултати.