Познати изведувачки имиња од Европа и од Македонија ќе одржат концерти во живо во салата на Националната опера и балет во рамките на програмата на 39. Скопски џез-фестивал, која, покрај многубројните ограничувања што ги донесе кризата со коронавирусот, е составена со императив да го сочува високиот интернационален карактер на фестивалот и традицијата тој да го нуди најдоброто од џезот и од импровизираната музика.

Новитет годинава ќе бидат бесплатниот онлајн-стриминг што ќе биде обезбеден за следење на сите концерти на фестивалот и што ќе овозможи негова достапност во целиот свет, додека за првпат е обезбеден и директен телевизиски пренос на сите концерти на националниот сервис на Македонската телевизија што, пак, ќе го направи фестивалот достапен на целата публика во земјата.

– При подготовката на ова, по многу нешта, специфично издание на Скопскиот џез-фестивал, во услови на иреална реалност што сите ја живееме, покрај главниот предуслов – безбедно одвивање на концертите со почитување на сите пропишани мерки и протоколи за заштита – се водевме од неколку приоритети: сочувување на високото ниво и меѓународниот карактер на фестивалот, поддршка на домашните џез-музичари, како и одржување на врските со американската и со норвешката креативна музичка сцена, што фестивалот ги негува веќе долга низа години во континуитет, а кои годинава беа доведени во прашање, со оглед на неможноста на американските и на норвешките музичари, поради ситуацијата, да патуваат вон границите на своите земји. И покрај огромните проблеми, пречки и тешкотии со кои, разбирливо, се судривме во овој исклучително деликатен процес, мислам дека успеавме да составиме висококвалитетна и возбудлива програма, достојна за репутацијата на фестивалот.

Она што е годинава различно и ново во однос на претходните изданија на фестивалот, имајќи го предвид редуцираниот капацитет (30 отсто) на салата на Националната опера и балет (НОБ), каде што ќе се одвиваат концертите, е достапноста на комплетната фестивалска програма на интернет, преку лајв-стриминг, но и преку националниот сервис, МТВ. Во исто време, за првпат во историјата на фестивалот, имаме споделување, односно пренесување на врвно музичко искуство од далечни локации, и тоа ексклузивно, само за потребите на 39. Скопски џез-фестивал – истакна Костадин Шурбановски.

Фестивалот ќе го отвори, премиерно кај нас, дуетот на двете балкански ѕвезди Влатко Стефановски и Теодосиј Спасов. Од Македонија учество ќе земат: специјалниот фестивалски проект на Тони Китановски и неговиот „мал биг-бенд“, потоа триото на Сашо Поповски со концертна промоција на новиот албум, како и сосема новата формација на Светлост + Одрон ритуал оркестра. Од Шпанија доаѓаат водечкиот фламенко гитарист Чикуело и реномираниот пијанист Марко Мезкида, од Австрија култните „Радиан“, од Хрватска пијанистот Матија Дедиќ, кој ќе одржи соло-рецитал со музиката на неговиот славен татко, а фестивалот ќе го затворат легендарните француски браќа Стефан и Лајонел Белмондо со својот квинтет.

Потврден е онлајн-стриминг на три ексклузивни концерти што ќе се случат во Њујорк и во Осло, а специјално за Скопскиот џез-фестивал ќе настапат триото на Вилијам Паркер, со Ава Мендоза и Џералд Кливер, дуетот Крис Дејвис / Ингрид Лауброк и големиот ансамбл на Тригве Сеим.

Програмата на фестивалот годинава опфаќа и промоција на две нови цеде-изданија на „SJF Records“: петтата албумска објава на Сашо Поповски Трио и првенецот на групата „Некст ту сајленс“ (Next To Silence).

– Видно возбуден ја дочекав веста дека издавач како „SJF Records“ ќе го издаде мојот трио албум „Fallen Land“. Да се биде дел од ова семејство е голема чест, но и поттик за понатамошна креативна работа. Секако, тоа е референца плус за мојата музика што во блиска иднина ќе ми помогне за интернационален букинг и промоција на македонската импровизирана музика во ЕУ. Среќен сум што во рамките на Скопје џез-фестивал на 17 октомври концертот на Сашо Поповски Трио ќе биде и промоција на албумот во живо пред македонската публика – изјави Сашо Поповски за „Културен печат“.

Музичкиот материјал за албумот „Fallen Land“ е снимен во 2019 година, а во снимањето учествуваа Сашо Поповски – гитара, Иван Бејков – бас и Виктор Филиповски на тапани и перкусии. Албумот содржи седум композиции. Задоволство и возбуда се чувствува и кај членовите на групата „Некст ту сајленс“.

– Скопскиот џез-фестивал ја препозна специфичноста на нашата музика и предложи издавање на нашиот прв албум во рамките на овој реномиран лејбел, како во регионални, така и во светски рамки. Тоа, секако, се должи на нивната доверба и на заемната почит, со оглед на тоа што десетина години функционираме како џез-состав и пополека го градевме звукот, кој стана препознатлив. Имавме одлична можност и привилегија да настапиме на минатогодишното издание на Скопскиот џез-фестивал, каде што претставивме дел од нашите композиции, а за кои имаше одлични реакции. Тоа ни овозможи да ѝ дадеме автентичен звучен, наративен и визуелен карактер на нашата музика, што веруваме дека ќе биде препознаено и во ова прво издание на „Next To Silence“. Затоа и му дадовме специфичен наслов на албумот („…“), што некако го илустрира она што е недокажано, премолчено или неизвесно, а воедно е содржано во музиката на нашиот првенец – објасни Гоце Наумов од групата „Некст ту сајленс“.

Клучни во создавањето на првиот албум на „Некст ту сајленс“ биле емоциите и умешноста на Александар Николовски, Филип Димишковски, Драган Стојковски и Гоце Наумов, звучните марифети на Ивица Јанкуловски, ентузијазмот и џезерската мисија на Оливер Белопета и Костадин Шурбановски, како и мистичните гласови на Каја и Веда.

Дизајнот на постерот за 39. Скопски џез-фестивал е на Јана Мишева. Во рамките на Скопскиот џез-фестивал ќе биде доделена и наградата „Златен Орикс“ за најдобар млад џез-музичар во 2020 година.

(Текстот е објавен во „Културен печат“ број 52, во печатеното издание на „Слободен печат“ на 10-12 октомври 2020)