22. „Оф-фест“: Импресивен спектар на уникатен и музички автономен јазик

Дизајнот на постерот и на промотивните материјали е на Зоран Кардула

Дваесет и второто издание на традиционалниот „Оф-фест“ ќе се одржи од 7 до 10 јуни во Националната опера и балет и во МКЦ, а годинава го сочинуваат осум концертни настапи и еден документарен филм.

Присутноста на „музиката на светот“ и традицијата на еден од најзначајните музички настани кај нас продолжува со ова издание. Фестивалот уште еднаш го потврдува високото реноме со исклучително богата и разновидна програма.

На 7 јуни во Националната опера и балет, фестивалот ќе го отвори импресивниот аудиовизуелен перформанс на славната португалска фадо-пејачка ѕвезда Мизија.

Фасцинантната моќ на модерната естонска фолк кралица Мари Калкун, во комбинација со раскошната интерпретација на македонската традиционална песна од страна на единствената Зарина Првасевда и нејзиниот состав, ќе создадат услови за беспрекорно фестивалско доживување на втората вечер.

Оригиналниот микс од пустинскиот гитарски блуз и транс ритмите на италијанската Таранта на тандемот Џастин Адамс и Мауро Дуранте, ќе ја пресретне софистицираната интроспективна лиричност и неодоливиот шарм, талент и визија на нашиот њујорчанец Крсте Роџевски.

За мистериозната аура на култната чешка двојка Ирена и Војтех Хавлови ќе сведочи нивното уникатно концертно патување, но и прикажувањето на документарниот филм „Little Blue Nothing: A musical portrait of Irena and Vojtech Havlovi“.

Годинашниот „Оф-фест“ ќе го заокружат фуриозните настапи на две исклучително возбудливи музички појави: новата ворлд-мјузик атракција „Баб л‘ блуз“ со својот психоделичен марокански фанк-рок звук, како и деветчлениот оркестар на легендарното име на конгоанската румба, гитаристот Дизи Манџеку & Одемба ок ол-старс.

Мизија е португалска фадо ѕвезда

Португалската ѕвезда Мизија е пионер, слободен дух, што успеа да изгради своја патека во жанрот и веројатно затоа го добила прекарот „анархист на фадото“. Првите успеси ги бележи во странство, прво во Шпанија и Јапонија, потоа во Франција и Германија. Набргу стекнала и светска популарност, започнувајќи вистинска интернационална кариера, којашто трае три децении.

Мари Калкун

Музиката на Мари Калкун, иако ја пее на јазик што малкумина го разбираат, создава медитативна и необична атмосфера која предизвикува многу емоции. Нејзините слободни музички аранжмани во основа ги детерминира звукот на канелот – традиционална естонска цитра.

Зарина Првасевда

На границата меѓу автентичноста и пренесувањето на културното наследство низ самоизразување, македонската уметница Зарина Првасевда го пронајде својот сопствен израз на долгоочекуваниот деби албум „Ехо“, издание што содржи 11 традиционални песни на 4 различни јазици. Објавен од „Кроација Рекордс“, албумот ја сумира уметничката визија на Зарина низ слободата и талкањето меѓу сите влијанија од фолклорното наследство што ја инспирирале.

Џастин Адамс и Мауро Дуранте

Дуото Џастин Адамс и Мауро Дуранте се врвни музичари со различен бекграунд кои ги обединува нивната длабока поврзаност со древната транс музика.

Крсте Роџевски

Крсте Роџевски е македонски пејач, гитарист и композитор, активен на авангардната „даунтаун“ сцена од неговата преселба во Њујорк во доцните деведесетти години на минатиот век. По издавањето на трилогијата: „Batania“ (2015), „Bitter Almonds“ (2017) и „The Rabbit And the Fallen Sycamore“ (2018), Роџевски ги снима „Hubris“ (2020) и „Fair Weather Friends“ (2022). Станува збор за концептуални албуми со интроспективни текстови и електроакустичен звук, збогатен со експериментални и фри-џез елементи.

Ирена и Војтех Хавлови

Чешкото дуо Ирена и Војтех Хавлови (The Havels) има речиси 40-годишна заедничка уметничка кариера и партнерство зад себе. Започнале да работат заедно кон средината на 80-тите години како дел од експерименталниот ансамбл „Capella Antiqua e Moderna“, уникатна асоцијација на музичари чиј репертоар опфаќа различни стилови на европската класична музика: од ренесансата до современата. Со текот на годините тие минаа низ неколку сопствени развојни фази, патувајќи долго и широко низ времето и просторот, развивајќи свој уникатен и музички автономен јазик. Интимно патување низ светот на Ирена и Војтех Хавлови ќе биде прикажано и со документарниот филм „Литл блу нотинг“ (Little blue nothing).

Баб л‘ блуз

Директно од срцето на Магреб, „Баб л‘ блуз“ (во превод: „Порта на блузот“), го редефинираат традиционалниот северноафрикански блуз на нетрадиционален начин. Овој квартет, формиран во Маракеш во 2018 година, е инспириран од мароканските музички традиции, во комбинација со рок музиката, современите звуци и мароканскиот поп.

Дизи Манџеку & Одемба ок ол-старс

Гитаристот Дизи Манџеку е жива легенда на конгоанската румба. Пред да стане член на славниот оркестар „OK Jazz“ на Франко Луамбо Макиади во 60-тите и 70-тите, Дизи веќе предводи неколку бендови, настапувајќи со бројни великани на конгоанската музичка сцена. Конгоанската румба од неодамна е прогласена за нематеријално културно наследство на УНЕСКО.

Програмата на „Оф-фест“ ја доловува разновидноста на музиката од сите континенти, фокусирајќи се на одделни категории, од традиционалната, етно, фолк и изворната музика сè до современите, урбани и експериментални музички струења. Листата на учесници низ историјата на „Оф-фест“ е импресивна, а годинава ќе биде збогатена со осум музички проекти.

(Текстот е објавен во „Културен печат“ број 181, во печатеното издание на весникот „Слободен печат“ на 2-4.6.2023)

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот