1МФЛ: Бод за Вардар, Шкендија чекор поблиску до титулата
Фудбалерите на Вардар ја продолжуваат грчевитата битка за опстанок и во денешното коло од Првата фудбалска лига одигра 1:1. Најтрофејниот фудбалски колектив во Македонија моментно се наоѓа на претпоследното 11. место на табелата со 28 бода, исто колку што има и Ренова, а има еден бод помалку од Силекс кој е деветти.
Ренова поведе со голот на Јашаровски во 15. минута но вардарци успеаја да израмнат во финишот од првиот дел и тоа преку Мартин Мирчевски.
„Црвено-црните“ на крајот можеа и да дојдат до победата, но шутот на младиот Стојановски заврши над голот на гостите.
Конкурентот во битката за опстанок, Силекс е поразен со 3:2 од Пелистер иако имаше водство од 0:2 по само 19. минути игра. Силекс поведе со головите на Ѓоргиев и Тантуровски, но Пелистер до крајот на полувремето успеа да дојде до израмнување. Прво Драгарски во 24. минута погоди за 1:2, а во 30. минута Илијовски донесе израмнување. Голот вреден три бода за Пелисер го постигна Нето во 71. минута.
Шкендија го искористи киксот на Шкупи кој загуби од Беласица, и со минималниот триумф над Академија Пандев дојде на само шест бода од шампионската титула. Стрелец на единствениот гол беше Ибраими во 53. минута.
Резултати:
Македонија ЃП – Борец 2:1
Пелистер – Силекс 3:2
Шкендија – А. Пандев 1:0
Шкупи – Беласица 0:1
Струга ТЛ – Работнички 1:1
Вардар – Ренова 1:1.