Бројот на починати во светот од коронавирусот ја надмина бројката од 10.000 луѓе, и денес во утринските часови тој изнесува 10.047. Заразени се 245.850 луѓе, а оздравеа 88.441.

И додека во Кина состојбата полека се смирува, во другите делови на светот болеста достигнува врв на бројот на заразени.

Каква е состојбата во делови на Европа најдобро илустрира фактот дека бројот на починати во Италија го надмина бројот на мртви во Кина.

Според податоците од утринава, во Италија има 41.035 случаи и 3.405 починати, следи Иран со 18.407 случаи и 1.284 смртни случаи, па Шпанија со 18.077 случаи и 831 починат. Германија сега има 15.320 случаи и 44 починати, а САД засега има 14.354 заразени и 217 смртни случаи.

Над десет илјади заразени има уште и во Франција, 10.995. Таму починаа 372 лица.

Од друга страна, Индија во недела на 22 март ќе воведе еднодневна забрана за движење на сите своите 1,3 милијарди жители. Полицискиот час ќе трае од 7 до 21 часот.