Прес точно 25 години, најдобриот возач во историјата на Формула1, Аиртон Сена, загина во 34-та година. Бразилецот со брзина од 300 километри на час на патеката „Енцо и Дино Ферари“ во Имола се заби во заштитниот ѕид на кобниот свиок Тамбурело. Иако загина млад, Аиртон Сена живееше доволно долго за да стане еден од најголемите возачи во историјата на авто мото спортот.

Во кариерата извозе 161 трка, победи на 41, имаше и 39. пласмани на подиумот, а освои три шампионскиот титули, сите со Мекларен. Беше одличен возач со голема харизма, роден победник со оригинално мото во светот на Формула 1, „Не сакав да победам во трката, туку во жувотот“.  Неговиот прекар беше „Дождовниот човек“.

Само еден ден порано, во Имола, кобната 1994 година, на тренингот загина Австриецот Роланд Раценбергер кој со брзина од 310 километри на час во кривината Жил Вилнев удри во заштитниот зид.

Сена по несреќата имаше средба со шефот на медицинскиот тим на Формула 1, Сид Воткинс кој му сугирераше на Бразилецот да не се трка викендов и да замине на риболов.
„Јас не можам да живеам без трките“, беше одговорот на Сена.

Малку е познато дека по несреќата, во неговиот болид е пронајдено австриско знаме кое по трката, Сена сакаше да го крене во чест на еден ден порано загинатиот Раценбергер.
Во петтиот круг при брзина од 307 километри на час, Сена ја загуби контролата над болидот на Вилијамс и удри во зид на кривината Тамбурело. Судбината сакаше да ги исполни неговите зборови, “Доколку загинам на патеката, би сакал тоа да се случи брзо“, иако не се знае дали смртта настапи на патеката, на патот до болницата во Болоња, или самата болница.
По смртта Сена стана уште поголем во очите на фановите, обичните луѓе, отколку што беше додека беше жив.

Кариерата ја започна во Толеман, до првата победа дојде со болидот на Лотус, а најдобрите резултати ги оствари во Мекларен каде освои три титули, пред заминувањето во Вилијамс.

Приказната за Сена започнува на 21 март 1960 година во Сао Паоло. Тој е роден во богато семејство кое уште на четиригодишна возраст му обозможи да влезе во најскапиот спорт во светот, автомобилизмот.

Своето деби на трките го имаше на 13-годишна возраст во картинг и веднаш победи. Желбата за напредување го однесе во Англија каде за три сезони освои три титули во Формула 3, кои му ги отворија вратите за влез во Формула 1.

Негово деби во Формула 1 беше во 1984 година за екипата на Толеман кој во претходната сезона освои само девет бодови. А, Сена во првите пет трки, имаше две шести места и две откажувања и симболично на Имола не успеа да се квалификува. На шестата трка во сезоната, во Монте Карло, Сена покажа за каков возач станува збор и зашто прекарот му беше “Дождовен човек“.

Трката во Монте Карло ја одбележа силниот дожд, а Сена стартуваше од 13. Позиција, дојде до првото место но на крајот заврши како второпласиран бидејќи според правилата, при прекин на трката се гледаат резултатите од претпоследниот круг, а таму Сена беше зад Алан Прост.

Во Монте Карло стана јасно дека Сена е возач за големи работи, тоа го виде Лотус кој му даде плата од еден милион долари во 1985 година.
Со болидот на Лотус, дојде до првата победа, на трката за ГН на Португалија во Есторил, а со жолтиот болид оствари уште пет победи пред да дојде повикот од Мекларен. Со „црвено-белиот“ болид оствари 35 победи и освои три титули со што си го обезбеди местото меѓу легендите на овој спорт.

Неговите вештини беа далеку од конкуренцијата, а неговата страст, немерлива за ривалите. Како мал беше очаен возач на дожд и чекаше да заврне за да може со својот картинг да вози како би се усовршил.  Механичарите не сакаа многу да работат со него, бидејќи беше перфекционист. Постојано ги „малтретираше“ со најситни детали кои би му овозможиле да биде најбрз на некој свиок или правец. Неговата генијалност ја видоа во Хонда кои го замолија да помогне во развојот на суперавтомобилот „NSX“.

Неговите борби на патеките со Алан Прост, Најџел Менсел и другите се легендарни но токму тие со неговиот агресивен стил на возење, ги освоија срцата на фановите. Во 2009 година од страна на асоцијацијата на возачи во Ф1 е избран за најдобар возач во историјата на овој спорт и инспирација за голем број на возачи.

Бразилецот беше свесен за својата големина во Бразил и во светот, и огромен дел од своето богатство го даваше во хуманитарни цели, а голем акцент ставаше на образованието и на сиромашните. Дури по смртта се дозна дека донирал околу повеќе од 200 милиони долари во хуманитарни цели.