Форум на Независниот синдикат на полицијата за 15 годишното постоење на граничната полиција
Синдикатот во 15 годишното постоење на граничната полиција беше тема на форумот што викендов се одржува во Отешево во организација на Независниот синдикат на полицијата.
На форумот присуствуваа претставници на сите синдикални организации на регионалните центри за гранична полиција, кои дебатираа за прашања од интерес на вработените во МВР посебно граничната полиција.
Претседателот на Независниот синдикат на полицијата Гоце Делчев Тодев оцени дека има објекти на граничната полиција кои имале проблем со струја, некои немале исправна вода за пиење, некаде се работело во лоши временски услови.
– Во повеќе од 70 отсто во објектите на граничната полиција нема исправна вода за пиење. Водата е само технички употреблива, диспанзери се донесени ама вода никој не доставува. Има гранични премини во кои дури нема ниту тоалет, рече Делчев Тодев.
Забележа дека Министерството за внатрешни работи ги игнорира нивните предлози, односно, како што рече, се прифаќаат, а заслугите одат на друга страна.
– До кога ќе се игнорираат нашите предлози за промени во колективниот договор, Законот за работни односи во кој може да се извршат корекции кои ќе помогнат во организација на работното време на сите гранични полициски станици до кои полициските службеници патуваат по пет и повеќе часови. Ние не бараме измени на цел закон бараме дополнитен член кој согласно начелото за економичност ќе доведе до заштеди во буџетот на МВР и поквалитна работа, истакна Делчев Тодев.
Според него, прашањата на кои било разговарано на форумот, ќе ги стават на документ и ќе ги достават до ресорното Министерство и до Владата.