Младиот фудбалски репрезентативец Елиф Елмас кој блесна во победата на Македонија над Летонија (3:1) во првото коло од квалификациите за Евро 2020, добро ги исплаши Словенците.

Словенечкиот спортски портал Екипа 24 објави статија со наслов „Младиот Турчин, кој е горд Македонец е најголемата закана за Облак“ во која посочува дека селекторот Игор Ангеловски има адут кој може да биде сериозна опасност кон голот на Јан Облак, еден од најдобрите голмани на светот.

„Македонија во споредба со Словенија има нешто помалку вреден состав. Словенечкиот во просек вреди 5,8 милиони, а Македонскиот за 1,8 милиони помаку. Но, селекорот Игор Ангеловски има еден адут, кој може да го затемни словенечкиот хоризонт в недела. Името му е Елиф Елмас, има 19 години и по вредност е над македонскиот просек – 7,5 милиони евра. Дијамантот е Турчин по потекло, ама ако се сомневате во неговата лојалност и верност кон Македонија се лажете – тој е горд Македонец. И не треба да чуди. Турција и Фатих Терим сакаа да го земат, ама тој реши да игра за земјата каде е роден и каде израсна. На 17 години дебитираше за Македонија е веќе станува клучна фигура во репрезентацијата“, пишува „Екипа24“.