Градоначалникот на општина Центар, Саша Богдановиќ на денешната прес-конференција во општината изјави разочарување во однос на одлуката што беше донесена од страна на Уставниот суд за времена мерка за укинување на таканаречениот мораториум за градба во општина Центар.

– Неизвршувањето на плановите, односно мораториумот беше во интерес на граѓаните и имаше силна поддршка од нив, поради тоа ја сфаќаме нивната револтираност по објавувањето на одлуката – изјави градоначалникот Богдановиќ.

Тој рече дека се уште не ја добиле официјално одлуката од Уставниот суд и дека кога тоа ќе се случи, тогаш ќе ги најави чекорите што ќе бидат преземени од општината. Градоначалникот апелираше до Уставниот суд за 30 дена да ја преиспита својата одлука, а ги повика коморите да ја повлечат иницијативата што ја имаат доставено до судот.

– Во моментов со правниот тим на општина Центар и со одредени стручни лица кои ги консултираме ги разгледуваме можностите што ќе ни бидат на располагање откако официјално ќе ја добиеме одлуката и воедно тогаш и ќе и ги најавиме на јавноста – соопшти градоначалникот Богдановиќ.