И Фиорентина влезе во трката за Елмас
Италијанската Фиорентина е последниот тим кој пројави сериозен интерес за ангажирање на македонскиот репрезентативец, Елиф Елмас. Според италијанските медиуми Фиорентина има подготвено 15 милиони евра за да му понуди на Фенербахче за услугите на младиот фудбалер.
Елиф Елмас повторно влезе во нотесите на голем дел од европските екипи со двата одлични настапи за македонската фудбалска репрезентација изминатиот викенд. Во победата од 3:1 над Летонија, Елмас учествуваше со два гола, додека во ремито од 1:1 на гостувањето кај Словенија беше еден од најдобрите поединци на теренот. Италијанскиот тим е последниот кој влегува во трката за потписот со Елмас, а втор од Серија А откако од зимава Лацио сериозно му фрли око на Елмас.
Елмас во Фенербахче замина од скопски Работнички во летото 2017 година и тоа за тренинг-компензација, а сега турските медиуми најавуваат дека Фенербахче нема намера да ги разгледува понудите кои ќе бидат помали од 25 милиони евра.