Уште една епизода од поткастот „Со Ана на ТИ“ можете да гледате вечерва во 20:00 часот, а овој пат гостува режисерот Синиша Евтимов. Синиша е еден од најуспешните театарски режисери кај нас, кој веќе 30 години ја гради својата кариера, создавајќи некои од најпопуларните претстави во театрите низ Македонија.

„Со Ана на ТИ“ е женски поткаст кој ќе ви пренесе нераскажани, лични приказни на луѓе кои оставиле уникатен личен и професионален печат во културата, уметноста, забавата и градскиот живот кај нас. Ќе зборуваме за првите љубови, болки, борби, падови и успеси кои сите нѐ прават луѓе.

Со Синиша разговаравме за неговите почетоци, детството, професионалниот пат во театарот, за неговиот пријател и соборец Мирко Попов, како и неговите ставови за општеството, културниот и уметнички живот во Скопје.